KUCHING, 24 Feb — Opis Bekal Ai Menua Pesisir (JBALB) Sarawak bebendar nyangkal tuduh pesan viral dalam tukuh ‘screenshot’ ti madahka bekal ai ke udah diperubat di Sri Aman udah kamah lalu nyadi pun pengelekai penyakit chirit enggau mutah.
Dalam penerang rasmi, piak nya nyemetak madahka bedau bisi penerang dikeluarka Opis Pengerai Sri Aman bekaul enggau dawa ke bisi dalam pesan nya.
Kelimpah ari nya, nadai bukti rasmi ti ngaitka kes pengerai ti diripotka nya enggau bekal ai berubat ti disadung JBALB Sarawak.
Nitihka penerang nya, dawa ti ngait penanggul pengerai mensia mayuh enggau bekal ai jabatan nya nadai pelasar, saru sereta spekulatif.
JBALB Sarawak mega nyemetak madahka bekal ai beresi ba semua palan beresi seruran dipatau nitihka standard pengelikun enggau kualiti ai ti udah ditetapka piak bekuasa.
Enti bisi isu bekaul enggau kualiti ai, pemadah rasmi semina deka disalur nengah jalai komunikasyen rasmi JBALB Sarawak enggau ejensi ke bekaul.
Berindik enggau nya, mensia mayuh dilalau anang ngerembaika mesej viral ti bedau disahka tulin laban pengawa ke baka nya tau ngasuh mensia mayuh ringat sereta ngeruga pengandal ngagai servis bekal ai.
JBALB Sarawak nyemetak madahka sida beratika pengawa nyadung penerang pelesu enggau berat lalu enda kakang ati ngambi atur ke patut ngagai sebarang piak ke ditemu nyadung berita pelesu. — RBI
