MERADONG, 26 Mac — Dua iku lelaki peranak menua tu diukum jil enggau sipat ulih Kort Seksyen Sarikei pengudah ditemu salah ari baruh Seksyen 39C(1) Akta Dadah Berbahaya 1952, kemari.
Ketuai Polis Pelilih Meradong, DSP Tansli Mering madah, dua iku orang ke dituduh nya beumur 28 enggau 25 taun didawa Bagi Pansik Jenayah Narkotik IPD Meradong ketegal ngembuan lebih dua kali diukum sebedau tu bekaul enggau kes dadah.
Nitihka penerang iya, dawa nya dibantaika ba mua Akim Yang Arif Puan Stella Augustine Druce, enggau subjek keterubah, ke ngembuan empat rikod sebedau tu, diukum jil lima taun, dua kali sipat enggau dua taun pengawa matau.
“Berebak enggau nya, subjek kedua ke ngembuan dua rikod sebedau tu diukum jil lima taun, sekali sipat enggau dua taun pengawa matau,” ku iya nengah siti penerang sehari tu.
Kes nya dipejalaika Pemesai Pendawa Raya Polis, Inspektor Herry Alban Ali.
DSP Tansli nyemetak madahka polis beratka penyalah dadah ba genturung pendiau lalu enda deka belembut ba sebarang pengawa ke bekaul.
“Mensia mayuh dilalau datai ke mua meri penerang dikena mantu raban polis ngelaban aktiviti dadah, kelebih agi ba pelilih Meradong,” ku iya.
Ku iya, sebarang penerang tau dikenataika ngagai Balai Polis Bintangor nengah lumur 084-693222.
Ngambika nyadi rikod, penyalah ari baruh Seksyen 39C(1) Akta Dadah Berbahaya 1952 mai ukum maksimum tujuh taun jil enggau nyentuk tiga kali sipat rutan. -RBI
