MIRI, 23 Mac — Kaban Kunsil Nengeri (ADUN) Mulu Datuk Gerawat Gala nyemetak madahka pengawa nyiri nyadi penghulu enggau tuai rumah ukai semina basa aja, tang mai tanggungpengawa ke besai.
“Ketuai komuniti bejalaika tanggungpengawa ti beguna nyadi jematan entara rayat enggau perintah.
“Sida ukai semina megai tanggungpengawa nyaga pengelantang dalam komuniti, tang mega ngenataika polisi enggau inisiatif pemansang perintah ba renggat pun menua,” ku iya.
Iya ke mega Sapit Menteri ba Opis Premier Sarawak (Kerja, Imigresyen enggau Pematau Projek), nyemetak madahka kerejasama rat entara ketuai komuniti, pengari rayat enggau peranak beguna amat dikena nentuka pengawa pemansang ulih dipejalaika enggau ngasi agi.
Iya mansutka jaku nya lebuh bejadika pengerami meri terima kasih udah diatur di Long Julan, Ulu Baram, Hari Enam nyin tadi.
Ba pengerami nya, dua iku ketuai komuniti Kenyah ari Lepo Abung Long Julan udah dipadu nyadi penghulu enggau tuai rumah, kelai jeman baru ba pengawa nyadi ketuai ba renggat baruh ba sitak nya.
Sida tu iya nya Penghulu Augustine Supen Taja ke dipadu nyadi penghulu ungkup kandang menua San di Ulu Baram enggau Ketuai Kaum Jacob Tugang ari Kampung Long Julan Asal.
Berindik ari pengawa nyiri nya, pengerami meri terima kasih dikena meri basa ngagai pengangkun ke udah diberi ngagai kededua ketuai nya.
Datuk Gerawat mega minta peranak Long Julan enggau kandang menua ngelingi terus meri sukung enggau kerejasama ngagai ketuai ke baru dichiri, ngambika ulih bekerejasama enggau perintah nengeri mai penyulut ke besai agi ngagai genturung menua enggau rebak dudi hari.
“Aku andal amat nengah peneleba, komitmen enggau semengat nyadi ketuai, Penghulu Augustine Supen Taja enggau Ketuai Kaum Jacob Tugang ulih bejalaika tanggungpengawa sida enggau manah ungkup pengelantang enggau penyulut komuniti ditu,” ku iya nambah.
Sama bisi ngulu atur pengawa nya ADUN Telang Usan Datuk Dennis Ngau enggau Residen Miri Galong Luang.
Kapsyen : KETUAI KOMUNITI…Gerawat ngarapka pengawa nyiri nya deka ngemai tanggungjawab ungkup rayat
