KUCHING, 3 April — Dua iku indu napi pengirau ati lebuh kerita Perodua Axia ke ditepan seduai iya tepawah sebedau bekalih ba penusah aksiden betungga ba Taman Perindustrian Demak, Jalai Bako, lemai kemari.
Ba penusah ke nyadi urung pukul 2.31 lemai nya, dua iku seduai ke beumur 56 enggau 58 taun nya benasit laban semina bakal mimit aja taja entukar ke ditepan seduai balat rusak.
Nitihka penerang ari Opis Bomba enggau Penyah Penusah Malaysia (JBPM) Sarawak, sida nerima kangau ngenyit bekaul enggau penusah nya urung pukul 2.31 lemai sebedau tim raban ari Balai Bomba enggau Penyah Penusah (BBP) Tabuan Jaya dianjung ngagai palan penusah nyadi.
Raban Penusah Ngenyit (PKO) ti betuaika Syamsyul Mustapha datai ba endur nya urung 11 minit udah nya.
“Lebuh datai ba endur nya, ditemu sebuah kerita Perodua Axia udah tepawah lalu bekalih ba bau jalai, ti ngaul dua iku indu,” ku penerang nya.
Kededua seduai diripotka mujur dipansutka mensia mayuh ari kerita nya sebedau raban bomba datai.
Seduai udah nya diberi perubat tumu ba palan penusah ke nyadi sebedau diserah ngagai Opis Menteri Pengerai Malaysia (KKM) ngambika atur silik dipejalaika sereta dibai ngagai sepital ngambika diperesa enggau silik agi.
Piak bekuasa ngelalau penguna jalai alun ngambika seruran bejimat sereta ngasika atur jalai alun dikena nyeliahka penusah ke enda dikedekaka nyadi. — RBI
