SEBAUH, 24 Mac — Perintah Sarawak tetap komited ngenegapka pemansang sosioekonomi menua pesisir nengah chara ngemeratka timbang entara pemansang infrastruktur enggau ngetanka penyerakup komuniti.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, pemansang fizikal aja enda chukup enti enda disukung penegap rama enggau nentuka pengelikun pemakai.
Nitih ku iya, chara nya setipak enggau aspirasyen Strategi Pemansang Pengudah COVID-19 2030 (PCDS 2030) ti ngeletakka inklusiviti nyadi batang pengawa nentuka penguntung ari pemansang diasaika enggau lantang ba rayat.
Iya madah munyi nya lebuh bejaku ba Pengerami Ramah Tamah Aidilfitri begulai enggau peranak di Kampung Labang, Sebauh.
Ba pemansang ke bekaul, iya madahka perambu nyendiaka perengka guna feri beungkus RM19 juta ungkup jalai nuju rumah panjai nya, ke diatu benung diserenih Opis Kereja Raya (JKR).
“Projek tu nyadi singkang pemungkal sebedau pengawa bejalaika ngaga jematan timpuh panjai nya nyadi nyata,” ku iya.
Ku iya nambah, palan nya deka nangkup pemansang ke udah bisi nyengkaum nyendiaka klinik enggau sekula baru ba sitak nya.
Ngelansa pasal sukut penyerakup, iya ngenang sejarah Kampung Labang ke kala nyadi palan pengenduh maya Jipun nguasa, enggau nya mandangka semengat liat ati enggau pengelantang komuniti pupu bansa.
Berindik enggau nya, iya minta bala ketuai komuniti enggau peranak menua nya terus ngetanka penyerakup lalu anang ngambi mudah pengelantang ti udah lama digaga, seraya mega bejejaga ari sebarang elemen ti tau ngeruga penegap nengeri tu, ti diuan urung 2.8 juta iku mensia.
Kelai sukung ngagai pemansang modal mensia enggau sosio-ekonomi komuniti, iya mega bisi madahka agih belanja penyampau RM30,000 ngagai Komiti Pemansang enggau Pengelikun Genturung Pendiau (JKKK) Kampung Labang enggau RM10,000 ngagai Gerempung Apai Indai (PIBG) SK Labang. – RBI
