MERADONG – Sapit Menteri Bekebun enggau Komoditi Dato’ Sri Huang Tiong Sii, ngenataika pemeri penyampau RM10,000 dikena nyukung aktiviti ninting taun IPD Meradong beserimbai enggau Pengerami Ngintu Hari Polis Ke-219.
Iya ke mega Kaban Parlimen Sarikei enggau Kaban Kunsil Nengeri (ADUN) Repok, minta raban bansa terus meri sukung enggau kerejasama ngagai Polis Diraja Malaysia (PDRM) dalam pengawa sida ngetanka pemaik enggau pengelantang ba kandang menua nya.
Ku iya, mensia mayuh patut seruran nemu sereta ngeripot sebarang aktiviti ti disangka dikena mantu raban polis bejalaika tanggungpengawa sida enggau lebih ngasi.
Iya mansutka jaku tu nengah teks ke dibacha pengari iya, Wong Zee Yeng.
Dulu agi ari nya, iya meri besai terima kasih ngagai raban polis di Meradong sereta serata menua ketegal komitmen sida ti seruran bejalaika pengawa nyaga pengelikun peranak, lalu enggau nya ngemuntangka komuniti ngasaika pengidup ti lantang asil ari kerejasama rat entara polis enggau komuniti menua nya.
Ba pengerami ke sama, iya ngaku pangku pengawa ke berat raban polis ke nyadi batang penyaga pengelikun menua.
Sama bisi datai iya nya Ketuai Polis Pelilih Meradong, DSP Tansli Mering, ADUN Meradong, Datuk Ding Kuong Hiing, Pemesai Pelilih Menua Meradong, Ting Kai Sing, ketuai opis perintah, ketuai komuniti enggau ketuai raban bansa, raban polis IPD Meradong, raban media, raban pinchin polis enggau komuniti menua nya.- RBI
