SRI AMAN, 7 Mac — Peranak Kampung Sungai Pinang, Ulu Skrang udah bekerejasama meresi sereta nyeruri gerija dalam pengawa nentuka rumah sembiang nya terus befungsyen nyadi palan rohani ungkup komuniti besemak.
Tuai Rumah Valley ak Rabong (Painggie) madah, gerija nya digaga dalam taun 2002 lalu naka 7 March 2026, begunan nya udah manggai umur 24 taun lalu terus nyadi palan endur raban Kristian begempuru besembiang, muji enggau ngemuliaka Tuhan.
Kenu ku iya, sepemanjai timpuh nya, gerija meruan bediri tegap ukai semina asil ari pengawa mensia, tang mega ketegal pengasih enggau berekat Tuhan ti seruran begulai enggau nembiak Iya.
Iya mega nerangka pemansang enggau pengelantang gerija tu mega asil ari kerejasama, komitmen enggau pengibub mayuh bengkah piak, kelebih agi gerija BEM KEC (Kuching Evangelical Church) begulai enggau bala umat ti udah taluk gawa ke Tuhan kenyau ari suba nyentuk ke diatu.
“Semua pengawa enggau pengibuh ke udah digaga mayuh bengkah piak amat besai reti sereta amat diberi basa dalam nentuka gerija tu terus nyadi palan endur nembiak Tuhan begempuru ngenegapka pengarap sereta nerenakka semengat pengerindu enggau penyerakup,” ku iya nerang ngagai Ruai Berita Iban.
Ku iya nambah, dikearapka gerija tu terus nyadi rumah rohani ungkup nembiak Tuhan sereta palan endur pengarap ditegapka, pengerindu diterenak sereta rebak dudi hari ulih ngelala Tuhan enggau semak agi.
“Program beripai ke diatur nya mungkur sepenyampau 15 iku peranak rumah panjai enggau tetiap pintu diarika siku pengari ngambika sama ngemujurka aktiviti nya” ku iya nerang. — RBI
