KUALA LUMPUR, 22 Mac — Perintah mengkang komited ngenegapka pengawa ngatur enggau ngetanka pengeraja asal ai menua dikena nentuka bekal ai beresi mengkang dijamin ungkup pengelantang rayat enggau pemansang menua.
Sapit Menteri Besai ke mega Menteri Transformasyen Kuasa enggau Transformasyen Ai (PETRA), Datuk Amar Sri Haji Fadillah bin Haji Yusof madahka, pengawa ngintu Hari Ai Sedunya nyadi pengingat ke beguna iya nya ai ukai semina nyadi pengeraja asal aja, tang nyadi darah pengidup ke patut diatur enggau meruan sereta dalam inklusif.
Nitih ku iya, Malaysia endang amat diberekat enggau pengeraja asal ai ke chukup, tang pemar baka ubah gaya hari, pemansang ke jampat sereta peminta ke majak nambah begunaka chara ngatur ke lebih beserakup sereta efektif.
“Rambai jaku Hari Ai Sedunya taun tu ti ngemeratka penyemaka enggau ‘Ai Milik Semua’ ngingatka kitai iya nya tetiap rayat bisi hak ngasaika akses ngagai ai beresi, likun sereta chukup,” ku iya.
Berebak enggau nya, iya mega nyemetak madahka isu pengelenyau ai ukai penatai pemisi (NRW) agi nyadi pemar besai ba sekeda nengeri, bepun ari paip pantis, enchuri ai enggau infrastruktur ke udah repuk.
Berindik enggau nya, bemacham pengawa benung dipejalaika nyengkaum ngangkatmanah sistem bekal ai, ngenegapka pengawa matau enggau ngurangka tikas NRW dikena nambahka penyikar pengawa ngagihka ai ngagai rayat.
Iya mega ngingatka penanggul pengamah pengeraja asal ai majak ngirauka ati berindik ari aktiviti ti nadai tanggungpengawa, muai uras enggau ubah guna tanah ti meri empas ngagai sungai enggau tekat ai.
“Nyaga pengeraja asal ai ukai semina tanggungpengawa perintah aja, tang begunaka kerejasama semua piak nyengkaum industri enggau mensia mayuh,” ku iya.
Ku iya nambah, perintah mega benung bejalaika Pelin Jalai Transformasyen Ai 2040 (AIR 2040) nyadi strategi timpuh panjai dikena ngenegapka pengawa ngatur ai menua, nentuka bekal chukup sereta ngemodenka sektor ai selampur.
Berebak enggau nya, iya nesau rayat ngambika pengawa bekelimat ai nyadi budaya ninting hari nengah chara ngena ai enggau bejimat sereta nyeliahka pengawa muai uras.
“Tetiap pengawa mit ke dipejalaika ulih meri empas ke besai ngagai pemanah bekal ai menua ungkup rebak dudi hari,” ku iya. – RBI
