SRI AMAN, 9 April – Menteri Betanam Betupi enggau Pengelikun Pemakai, Datuk Seri Haji Mohamad Sabu meri jamin bekal beras menua tu chukup ambis nadai nyentuk ujung taun tu.
“Aku ngemeratka sekali agi, insya Allah, bekal beras kitai chukup sereta nadai penanggul, abis nadai nyentuk ujung taun tu enggau rega ke diatu,” ku iya.
Berindik enggau nya, iya ngelalau mensia mayuh anang ngaga pengawa bebelika barang enggau chara berumban ti tau ngeruga penegap makit.
“Enti selalu ngena dua kampit beras sebulan, barang ke dibeli kita terus ba rega nya lalu enda ibuh bebelika beras kelalu mayuh.
“Pengawa meli barang enggau ngenyit tau ngasuh bekal tejanggal ba makit lalu muka ruang ngagai sekeda piak beambi ulih sereta nikika rega,” ku iya nyemetak.
Iya madah munyi nya ba aum pengarang berita pengudah bejadika Program Gelumbang Padi Sarawak: Bumai Bedandang Besai (SMART SBB) enggau Hari Mensia Mayuh IADA Batang Lupar 2026 di Dewan Sri Nangkai, Gran Stumbin, sehari tu tadi.
Sebedau tu, Projek Nanam Padi Chara Besai SMART (SMART SBB) di Batang Lupar ditagit ulih nyapai asil pemansut nyentuk tujuh tan padi sehektar, lalu enggau nya ulih mantu nambahka tikas Pengelepas Diri (SSR) kelebih agi ungkup guna Sarawak.
Mohamad muji prestasi projek ke diatu ti diatu udah mujur nambahka asil pemansut ngagai 5.5 tan sehektar enti dibandingka semina 2.8 tan sebedau tu.
“Ditu iya mungkur pemesai 105 hektar, kandang endur ke besai endur nanam padi lalu kitai meda penambah pemansut ari 2.8 tan ngagai 5.5 tan sehektar, ti nyadi penambah ke amat chukup meransang.
“Aku ngarapka jemah ila, pemansut tu ulih manggai nyentuk tujuh tan sehektar, enggau nya mantu nangkup SSR, kelebih agi ungkup Sarawak dulu,” ku iya.
Program SMART SBB di Sarawak dipejalaika IADA Batang Lupar nengah kerejasama strategik enggau Padiberas Nasional Berhad sereta Advansia (Sarawak) Sdn. Bhd..
Bepelasarka rikod, projek tu ngerikod penambah asil ke nyata ba musim kedua taun 2023 enggau asil urung 5.5 tan sehektar dibandingka semina 2.8 tan sebedau dipejalaika chara moden. -RBI
