LIMBANG, 11 April — Perintah Sarawak disadang deka madahka bantu khas dikena mutarka ungkus pengidup ke deka dipejuraika enggau silik minggu baru, berindik ari penuduk wang nengeri tu ke majak tegap.
Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg madah, inisiatif nya deka dikerandau dalam aum Kabinet Nengeri sebedau dipadahka enggau rasmi, laban nya mungkur agih belanja ke besai.
“Minggu ti deka datai, aku deka madahka siti agi bantu ungkup rayat dikena mutarka ungkus pengidup.
“Bepelasarka belanja ke bisi diatu, pelaba aku kitai ulih bejalaika nya ungkup pengelantang rayat Sarawak,” ku iya.
Iya madah munyi nya lebuh bejaku ba Pengerami Makai Lemai Ketuai Begulai enggau Ketuai Komuniti enggau Ketuai Kaum (KMKK) ba Dewan Sivik Limbang, ditu, kemari.
Ngenang pasal pemansang ekonomi, Abang Johari mantaika Sarawak diatu ba jalai ke betul dalam ngiring ekonomi hidrogen, ke udah nyata lebih ngelimat belanja ari minyak konvensional.
Nitih ku iya, asil pansik bulan Mac tu tadi mandangka ungkus ngasilka hidrogen di Sarawak diatu murah agi ari rega diesel ke diatu ti dikeruga geopolitik global ti enda tentu.
“Kitai udah milih tenaga ke betul dikena nyungkak agi pemansang ekonomi kitai.
“Enggau rega diesel kemaya hari tu, nyata ungkus ngasilka hidrogen murah agi.
“Reti nya visyen kitai deka ngubah ekonomi nengah teknologi gadung enggau pengeraja asal ke ulih dikena baru udah berengkah ngayanka asil,” ku iya nerang.
Berebak enggau nya, Abang Johari mega mai berita manah ngagai ketuai renggat baruh lebuh perintah nengeri setuju mansik baru sereta nambahka tikas elawin ungkup Ketuai Komuniti enggau Ketuai Kaum (KMKK).
Iya nyemetak madahka penambah nya siti chara ngaku pemesai guna KMKK nyadi jematan entara perintah enggau rayat, kelimpah ari nentuka pengawa meri servis ba renggat pun menua mengkang efisyen.
“Ketegal gaya ekonomi kami ti tegap sereta belanja ti tegap, kami ulih meri servis enggau pengelantang ti manah ngagai ketuai suku bansa enggau komuniti kami.
“Aku setuju elawin tu patut diperatika baru sereta ditambah,” ku iya nambah.
Sama bisi datai ngulu pengerami nya Sapit Menteri Besai Datuk Seri Fadillah Yusof, Sapit Premier Sarawak Datuk Amar Awang Tengah Ali Hasan, Menteri Utiliti enggau Telekomunikasyen Dato Sri Julaihi Narawi, Menteri ba Opis Premier Sarawak Dato Sri John Sikie Tayai,
Sapit Menteri Utiliti enggau Telekomunikasyen Sarawak Datuk Liwan Lagang, Sekretari Perintah Nengeri Sarawak Datuk Amar Mohamad Abu Bakar Marzuki, Sapit Menteri Perengka Pengangkut, Datuk Hasbi Habibollah enggau Sapit Menteri Pemansang Pemakai Sarawak enggau Datuk Dr. Abdul Rahman Ismail, ADUN Batu Danau Dato Paulus Palu Gumbang enggau bala pemesai ke bukai. — RBI
