SELANGAU, 2 Mac — Raban Penyaga Pengelikun Mensia Mayuh Malaysia (APM) di pelilih Selangau nerima kangau ngenyit pukul 6.40 pagi bekaul enggau penusah eksiden ba jalai alun semak Jematan Batang Mukah sehari tu tadi.
Nitihka penerang rasmi, tiga iku kaban APM dianjung ngagai endur nya lebuh nerima ripot nya ngambika bejalaika pengawa mansik keterubah enggau operasyen bantu.
Penusah nya mungkur sebuah lori enggau sebuah kerita Proton Saga ti bisi dua iku mansa.
Asil peresa tetemuka mansa keterubah bisi bakal mimit lalu mansa kedua nadai bakal.
Kededua mansa diberi perubat keterubah ba palan nya lalu enda begunaka pemindah ngagai klinik ngambika diperubat enggau silik agi.
Mensia mayuh dilalau lengkas betanya ngagai talipaun APM Selangau ba lumur 084-891285 nyema bisi penusah ngenyit nyadi ba kandang endur diri empu dikena nentuka bantu ulih dikenataika enggau lengkas. — RBI
