KAPIT, 23 Mac – Aku deka madahka enti udah datai ba maya aku enda agi bediri minta pilih nyadi chalun Parlimen Kapit, Datuk Alvin Runggah Jimbun nya individu ti deka megai tanggungpengawa nya,” ku Menteri Kereja Raya Dato’ Sri Alexander Nanta Linggi.
Ku Nanta, pengarap dilempaika ngagai Datuk Alvin Runggah Jimbun ngambika iya ulih neruska legasi nyadi ketuai ti ulih ngempung semua piak sereta nyungkak pemansang Kapit ngagai tikas ke tinggi agi.
“Budaya Pesaka ti ngemeratka penyerakup, berunding enggau bebasaka pangan diri nyadi pengelebih ti enda tau enda dikemeran.
“Nilai tu mega nyadika lalau dalam neruska legasi nyadi ketuai, nyengkaum dalam ngingatka jasa ketuai ke dulu suba baka Tapah Ata.
“Sukung ti tegap ari selampur komuniti diguna dikena nentuka pengawa diteruska enggau pemujur,” ku Kaban Parlimen Kapit nya.
Iya mansutka jaku tu nengah Facebook iya beserimbai enggau Pengerami Makai Lemai Terima Kasih, Diri Sebilik enggau Bala Kaban ti diatur dalam gaya ti mandangka semengat beserakup enggau kerejasama rat entara komuniti di Kapit.
Ku tampung Nanta, Datuk Alvin Runggah Jimbun udah diberi pengandal terus bejalaika tanggungpengawa ti beguna dalam neruska agenda pemansang.
“Iya ukai nama baru, tang udah lama gawa sereta bejalaika mayuh macham tanggungpengawa nyengkaum nyadi Pemesai Tugas Khas (PTTK II), lalu indah dikelala mayuh nyengkaum ba renggat pentadbiran nengeri,” ku iya nerang.
Pekara tu mega ku Nanta, udah dibuktika lebuh pengari ari Kapit ke bediri minta pilih ba Kaban Supreme Parti (MKT) sayap Pesaka PBB mujur teulihka siti ari undi ke pemadu tinggi, mandangka penegap enggau penyerakup ke bisi ba bala kaban.
Ngelansa pengerami nya mega, Nanta madahka semengat beserakup enggau kerejasama meseti terus ditan sereta ditegapka dikena nentuka penerus pemansang di Kapit ulih diteruska enggau mujur.
“Munyi ku sempama jaku Iban, “batu tungku nemu besengki”, reti nya kitai deka seruran kena laya enggau beserekang penemu.
“Taja pia, dalam pengawa nempa pengidup ke manah agi jemah ila, raban ke bepeneleba mesti terus bejalaika tanggungpengawa nyadi lalau, seraya rebak baru mesti diberi awak mansang ke mua sereta megai tanggungpengawa,” terang iya.
Nanta mega nerangka tiap – tiap renggat mensia mayuh bisi nilai enggau pengawa kediri empu enti diatur enggau manah.
Berebak enggau nya, bekaul pengawa ngetanka hak Sarawak nengah PETROS, Nanta madahka pengawa tu mesti terus disukung laban nya deka nyadi pun penatai belanja ti beguna ngagai penyulut nengeri tu.
Polisi ke dibai ketuai nengeri kemaya hari tu mega ku iya, nyata meri penguntung ke besai ngagai rayat, nyengkaum peluang pelajar tinggi ke diatu muntang agi diakses. Tu meh peluang ti patut dikena bala nembiak rebak baru enggau penuh.
Berindik ari nya, iya begunaka sukung penuh ari selampur komuniti Kapit dikena nentuka penerus pemansang ulih diteruska enggau penyulut ke besai agi. – RBI
