MIRI, 7 April – Pejalai siku lelaki tejanggal enggau penusah lebuh kerita pikap ke deriba iya aksiden pengudah betempuh enggau sebuah lori ke benung bejalaika pengawa melakin jalai di Jematan Lutong, tumu pagi tadi.
Ketuai Balai Bomba enggau Penyah Penusah (BBP) Lutong, PBT II Henry Jugah madahka, sida nerima kangau ngenyit urung pukul 12.08 tengah malam sebedau seraban bomba dianjung ngagai palan penusah nyadi.
Lebuh datai ba endur nya, Palan Penyaga Operasyen (PKO) ngentaska eksiden nya ngaul sebuah kerita Toyota Hilux.
Tudah ke ngena Hilux ditemu tepekul ba penuduk deriba, lalu raban bomba ngena perengka khas ke dikumbai ‘rescue tool’ netak pintu kerita dikena ngemansutka iya.
Tudah udah mujur dipansutka tang dientaska Opis Menteri Pengerai Malaysia (KKM) bebadi ba palan penusah ke nyadi sebedau diserah ngagai polis ngambika atur nangkanka nya dipejalaika.
Operasyen ti ngaul lima iku raban enggau sebuah entukar FRT nya tembu abis pukul 1.10 pagi pengudah gaya dientaska likun.
Sama bisi datai ba endur nya, Polis DiRaja Malaysia (PDRM) enggau Opis Menteri Pengerai mantu ngatur penusah. -RBI
