KUCHING, 3 April — “Arapka pemaik bepun ari tiap iku kitai,” ku Uskup Agung Gereja Roman Katolik Kuching Dato Dr Simon Poh beserimbai enggau pengerami ngintu ‘Good Friday’ enggau Easter 2026, sehari tu.
Iya madahka hari besai ke diintu raban Kristian serata dunya kelebih agi di Sarawak chukup besai reti, sebuah nengeri ti dikelala enggau mayuh bengkah jalai pengarap, budaya enggau penegap penyerakup.
‘Good Friday’ ku iya, dikena ngingatka pemerinsa, regang enggau pemati Jesus Kristus ke nyadi lambang pengerindu enggau pengasih Tuhan ke pemadu tinggi ngagai mensia.
“‘Good Friday’ mai kitai belematika chara kitai ngidupka pengidup kitai, sekalika nya enggau pengasih, pengibuh enggau pemanah ati ngagai orang bukai sereta pengeran berambun nyawa ke kitai sama mensia,” ku iya dalam jaku pesan beserimbai enggau pengerami ngintu ‘Good Friday’.
Iya nyemetak madahka, nilai pengampun ti dipandangka ba jaku kepenudi Jesus ba regang nyadi chunto ti beguna dalam nempa raban bansa ti dalam pemaik sereta bebasa, kelebih agi dalam pupu raban bansa di Sarawak.
Iya mega nerangka regang ti ngayanka gamal Kristus nyadi kelai ti beguna dalam pengarap Kristian, kelai ngingatka pemerinsa Jesus laban deka nebus dosa tauka penyalah mensia.
“Regang ukai semina nyadika lambang tauka pengias aja, tang nyadika pengingat ngagai kitai ngambika idup enggau pengasih, pengampun sereta berambun nyawa baka ti dipandangka Kristus,” ku iya.
Berebak enggau nya, iya nesau raban Katolik di serata dunya ngambika begempung dalam sampi begulai enggau Paus Leo XIV ke pemaik dunya, kelebih agi sida ti tekeruga ketegal perang enggau penyarut.
Dipelabaka kurang lebih 1.4 bilion raban Kristian Katolik ngambi bagi ba pengawa besampi khas ‘Good Friday’, nyengkaum besampika ketuai Gerija, penyerakup raban Kristain sereta ti benung pedis merinsa.
Di Sarawak, pengerami ‘Good Friday’ dikelai enggau hari besai ti meri awak ngagai raban Kristian ngelu pengawa besembiang, besampi begulai enggau diri sebilik sereta beratika reti berambun nyawa enggau pengasih.
Pengerami tu mega disempulang enggau jaku pesan ari bala ketuai nengeri ti minta rayat terus nyaga pemaik enggau pengelantang, ulih nerima penemu pangan diri sereta bebasaka pangan diri kelebih agi nengeri tu diuan pupu raban bansa enggau jalai pengarap.
Kelimpah ari nya, beserimbai enggau ‘Good Friday’ pengawa bepuasa mega enda tau enda ti nyadika tanda nesal ati sereta beserakup enggau Kristus.
