KUCHING, 22 Mac — Pengerami Rumah Tebuka Hari Raya Aidilfitri 1447H/2026 diatur Ketuai Pemegai Menua Tuan Yang Terutama (TYT) Yang di-Pertua Negeri Sarawak Tun Pehin Sri Dr. Haji Wan Junaidi bin Tuanku Jaafar enggau Toh Puan Datuk Patinggi Fauziah binti Mohd Sanusi udah diatur ba kompaun Astana Nengeri Sarawak kemari ngempuruka 25,000 iku temuai datai.
Pengerami ke berengkah tumu pukul 9.30 pagi nya, bela digulu bala ketuai tinggi menua enggau nengeri, nyengkaum Sapit Menteri Besai, Sapit Premier Sarawak, Speaker Dewan Undangan Negeri Sarawak, menteri Perintah Besai enggau nengeri, sereta bala pemesai ke bukai.
Muak ke pagi, bala temuai dipebasa diperindang ba Dewan Santapan sebedau pengerami nya dibuka ngagai mensia mayuh ari pukul 11.00 pagi nyentuk pukul 4.00 lemai.
Penatai mensia mayuh ari mayuh macham bansa enggau penatai nyengkaum temuai ari menua luar ngangkatka agi gaya pengerami Aidilfitri ti chukup richah.
Pengerami pengerami nya mega dikemeratka bemacham pekayan asal ke dikena bala temuai ti mandangka penyelai enggau pengelantang komuniti pupu bansa di Sarawak.
Penatai ketuai bemacham jalai pengarap mega mandangka semengat bekerejasama enggau penyerakup ti tegap ba rayat nengeri tu.
Kelimpah beperindang enggau bemacham pemakai asal Hari Raya, bala temuai mega dijamu enggau aktiviti bukai baka pekit nyura anak mit, pengawa pemerindang sereta nebah meriam buluh ti nambahka agi richah rampa menua.
Pengawa tu ukai semina nyadi pelasar dikena ngintu Aidilfitri, tang mega nyadi pelasar ngerapitka kaul entara ketuai enggau rayat dalam gaya ti bebaik sereta baka diri sebilik.
Berebak enggau nya, TYT Tun Pehin Sri Wan Junaidi enggau Toh Puan Fauziah ngenataika jaku puji ke pemadu tinggi ngagai semua mensia mayuh ke bisi datai enggau semua piak ke bisi kaul ngatur pengawa nya.
Iya mega meri besai terima kasih ngagai pengawa nerima pengabang ti chukup meransang sereta besampi ngambika Aidilfitri taun tu mai berekat, pengelantang sereta terus ngenegapka penyerakup rayat Sarawak.
Bela bisi datai Sapit Menteri Besai, YAB Datuk Amar Haji Fadillah Yusof begulai enggau bini iya Datin Amar Ruziah binti Mohd Tahir; Sapit Premier Sarawak, YB Datuk Amar Douglas Uggah Embas enggau bini Datin Amar Dato Doreen Mayang, Sapit Premier Sarawak YB Datuk Amar Professor Dr Sim Kui Hian; Speaker Kunsil Nengeri Sarawak, YB Tan Sri Datuk Amar Haji Mohamad Asfia Awang Nassar; Menteri Perintah Besai enggau Sarawak; Sekretari Perintah Nengeri Sarawak, YB Datuk Amar Haji Mohamad Abu Bakar Marzuki begulai enggau bini iya Dato Hajah Baduyah binti Haji Bujang; Bala Sapit Menteri; Bala Kaban ti Dipebasa enggau bala pemesai bukai — RBI
